Wort zur Woche: "Dörf jeedeen hören"

02.06.2018

Wort zur Woche von Johannes Pfeifer, Pastor in Ruhestand in Schleswig

Siet veele Johren is de 2. Sündag na Pingsten „Plattdüütsch Sündag“. Denn ward in veele Gemeenden op Platt predigt un sungen  (in’ Schleswiger Dom eerst 2 Weken later). „In uns’ Moderspraak“, hebbt wi fröher seggt. Dat gellt hüüt woll nich mehr. För mi is dat mien „Grootmoderspraak“. Vun mien Oma heff ik nich bloots Plattdüütsch liehrt, dat gode Holsteener Platt (hett in’ Loop vun de Tiet noch’n Ditmarscher un Schleswiger Inslag kregen).

In mien Kinner- un Jugendtiet hett uns’ Oma mit bi uns to Huus wohnt. Wi hebbt veel mit ehr beschnackt. Se hett veel vertellt. Vun fröher, vun de Familie, vun ehr’n Globen. Ok vun de Politik. Se sülms kunn mit ehr meist 90 Johren nich mehr goot hören. Dorüm harr se woll ok en recht lude Stimm. „Oma, nich so luud“, hebbt wi denn seggt, wenn wi mit ehr buten in’ Goorn seten. „Dörf jeedeen hören“, weer ehr korte Antwoort un denn hett se uns en Satz ut de Bibel seggt, to’n Bispill „De Herr is mien Harder …“. 

Dor heff ik an dacht, as ik den Vers för düssen Sündag leest heff. „Jesus seggt to sien Jüngers: De ju hören deit, de höört mi; un de nix vun ju weten will, de will ok nix vun mi weten“ (Luk. 10,16). Wat Jesus seggt hett, „dörf jeedeen hören“, schall jeedeen hören. Vun un dörch anner Lüüd, de dat künnig maakt. In de Kark, in de School, in de Familie. Dorför sünd sünnerlich de Omas ganz wichdig. Un wi sülms hebbt dor en grote Opgaav.

„Gott geev uns Ohren, so köönt wi hören, he geev uns Wöör, dat wi uns verstaht“, heet dat in een Karkenleed ut de 60er Johren. Tohören, dat is wichdig. Awers de annern dörft ok geern mit düütliche Wöör vun uns hören, wat wahr is, wat opbuut un goot deit, wat den Freden deent. „Op Platt dor schnackt dat Hart sik ut“, seggt wi. „Dat kummt vun Harten, und at geiht to Harten“. Nich bloots an’ Plattdüütsch Sündag.