Aarndank in St. Laurentius

06.10.2025

Hüüt hebbt wi Aarndank fiert. De Altar weer wunnerboor schmückt vun veele Lüüd ut Rehbarg un vun twee Schoolklassen, mit Kantüffeln, Bohnen un Arfen, mit Appeln, Kohl, Mais un Röben, mit Koorn un Eier. Wie hemm rieklich to Eeten, all wat wie wullt und doch heff ik dat Geföhl, je beter uns dat geiht, je weniger denkt wie ant Danken. Wie gau allns normal warrd und sülvsverständli is: Obends ohne Hunger to Bett, Opstohn un in Düüstern dat Licht anmoken, nie Bang ween, dat dat Eten knapp ward. Un wenn doch, denn bestellst du obends Klock 9 noch een Pizza.

All de goden Gaben kaamt her vun Gott, den Herrn; so seggt em Dank, so seggt em Dank un glöövt an em!

In de Bibel geiht dat dorum dankbor to ween un denn uk aftogeben an annere. Un dat liggt in uns Minschen vun lütt an. Jedet lütte Baby, dat den Leppel fastholen kann, well sien Öllern füttern.

Veelen Dank an unsen Gott! Un veelen Dank an all de Buern, de Fischers, de Schlachters, de Bäckers, de Aarnthölpers un de in‘n Supermarkt an de Kass sitten doot.

Hartli gröt Di

Daniel Karstens