Wort zur Woche: "Dor is Platz för di"

17.06.2022

Wort zur Woche von Johannes Pfeifer, Pastor i.R. in Schleswig

All de Lüüd hebbt Platz funnen. Dat weer vörigen Sündag bi den groten Landesposaunen-Dag in Plön.  Meist 800 Minschen hebbt mit ehr Instrumenten op de grote Rietbahn bi dat Plöner Slot stahn oder seten. Dor bruukst du Platz för di, för Notenstänner, Instrument un ok Platz to’n Kieken op den Dirigenten dor vörn.

„Dor is Platz för di“ weer dat Motto vun unsen Landesposaunen-Dag. De Satz hett to daan mit de Johrs-Losung 2022 ut Johannes sien Evangelium (6,37): „Wenn een to mi kümmt, den wies ik nich af,“, seggt Jesus. He seggt dat in Gott sien Naam.  Disse Inladung hett ok hüüt noch ehr Bedüden. Dor is Platz, nich bloots för di: Bi uns in’n Posaunenchor, in de Gemeende, in de Kark, in uns Plattdüütsch Krink un an anner Plätz.

Dat is nich schöön, wenn een, de dor ankümmt, to hören kriggt: „Disse Platz is leider besett! Keen Platz för di!“. Op de grote Rietbahn weer Platz för en Barg Lüüd. As wi mit’n anner Musik maakt hebbt, weer dat en gode Geföhl vun grote Gemeenschap, öwer de Generatschonen weg, vun 8 bit 
88 Johren. Jeedeen is wichdig! Ok de, de nich allens mitspelen kann. Un wenn dor en Grupp en beten later keem, weer dor noch Platz genoog.

Blangenbi vun de Rietbahn hebbt all de Tohörers Platz funnen un sik op dat Gras lagert oder sülm en Stohl mitbröcht. Luuthals hebbt se mitsungen: „Giff Freden, Herr, giff Freden …!“ Ja, dat weer un dat is uns Gebeet. De Freden fangt bi uns an, ganz lütt. Dor köönt un mööt wi sülm war för daan bi uns dääglich mit’n anner Ümgahn. „Dor is Platz för di!“ Köönt wi dat hartli seggen to all de Minschen, de as Utlänner to uns kamen, besünners de, de op de Flucht sünd oder Asyl söcht? 

Dat is goot un dat deit goot, wenn een seggen kann: „Lewe Gott, dor is Platz för di, bi uns, in mien Leben“. Denn is dor Platz ok för de annern.